एफआरपीसाठी स्वाभिमानीचे पुण्यात होणार आंदोलन

शेतकर्‍यांना उसाची एफआरपीची रक्कम एकरकमी मिळण्यासाठी विविध आंदोलने करूनही त्याची दखल घेतली नसल्याने अखेर 28 जानेवारी रोजी स्वाभिमानी शेतकरी संघटनेच्या वतीने पुण्यात साखर आयुक्त कार्यालयासमोर संपूर्ण महाराष्ट्रातील शेतकर्‍यांच्या  वतीने आंदोलनाचे आयोजन करण्यात आले असून त्यासाठी आपल्या भागातील शेतकर्‍यांनी मोठ्या संख्येने सहभागी व्हावे असे आवाहन स्वाभिमानी शेतकरी संघटनेचे जिल्हाध्यक्ष समाधान फाटे यांनी पत्रकार परिषदेत केले आहे.

यावेळी बोलताना फाटे म्हणाले की,राज्याचे सहकार मंत्री या जिल्ह्यातील असूनही व त्यांच्या भंडारकवठे येथील करखान्यासमोर तसेच जिल्हाधिकारी कार्यलयासमोर आम्ही शेतकर्‍यांच्या एक रकमी एफआरपीसाठी धरणे आंदोलन केले.त्यावेळी या सहकार मंत्र्यांनी एफआरपी अधिक दोनशे रुपये देण्याचे कबूल केले मात्र यावर्षीचा गळीत हंगाम सुरू होऊन 70 दिवस उलटले तरी अजून जिल्ह्यातील अनेक कारखान्यांनी एफआरपी ची रक्कम दिली नाही. शेतकर्‍यांचे नेते खासदार राजू शेट्टी यांनी केलेल्या दूध आंदोलनाला यश आले.शासनाने दुधाला प्रति लीटर 5 रुपये अनुदान देण्याचे मान्य केले.मात्र अद्याप काहीही हाती आलेले नाही.