पुरुषप्रधान संस्कृतीला एकच सवाल – लग्नानंतर मुलगी, मुलगी राहत नाही का ? स्मिता गुलाबराव शेळके .

पुरुषप्रधान संस्कृतीला एकच सवाल – लग्नानंतर मुलगी, मुलगी राहत नाही का ?
स्मिता गुलाबराव शेळके .

पारनेर :- प्रतिनिधी : – सुदाम दरेकर :-

जी एस महानगर सहकारी बँके चा निवडणुकीचा बिगुल वाजला असतानाच , शुभेच्छा आणि सदस्यांकडून मिळालेल्या पाठिंब्यामुळे मी खूप आनंदी आहे. परंतु , एक चुकीचे कथन माझ्याबद्दल तयार करण्यात आले आहे, ज्यामध्ये लग्नानंतर माझ्या गुजराती घराण्यातील वैवाहिक स्थितीचा चुकीचा संदर्भ घेतला जात आहे. या चुकीच्या प्रचाराला उत्तर देणे गरजेचे वाटते. माझ्या बद्दल चुकीचा प्रचार करून जाणीवपुर्वक सभासदांच्या मनात गैरसमज पसरविण्याचे काम काही व्यक्ती करत असून माझ्याबाबत चुकीचे आणि अनावश्यक मुद्दे उपस्थित करत आहेत , असे स्पष्ट प्रतिपादन जी एस महानगर बँकेचे संस्थापक अध्यक्ष सॉलिसिटर गुलाबराव शेळके व अध्यक्षा सुमनताई गुलाबराव शेळके यांच्या कन्या व संचालिका स्मिता गुलाबराव शेळके यांनी केले आहे .
त्या पुढे म्हणाल्या की , मी जी . एस . महानगर को-ऑपरेटिव्ह बँक गुजरातला नेणार आहे , असा खोटा आरोप माझ्यावर केला जात आहे , पण मी स्पष्टपणे सांगू इच्छिते की , मी कायदेशीर आणि वैयक्तिकरित्या, नेहमीच स्मिता गुलाबराव शेळके आहे. माझे नाव माझ्या पालकांच्या वारसाचे आणि माझ्या संस्कारांचे प्रतीक आहे, ज्यांनी मला सत्यता आणि सेवा शिकवली आहे. माझे गुजराती घराण्यात लग्न झाले आहे, पण त्याचा अर्थ असा होत नाही की, मी माझ्या मूळ शेळके कुटुंबाचा भाग राहिलेली नाही. एका मुलीचे तिच्या कुटुंबाशी असलेले नाते लग्नामुळे कधीच संपत नाही. माझ्या मूळ घराण्याशी असलेले माझे प्रेम, निष्ठा, आणि मूल्ये कधीही कमी होणार नाहीत. माझ्या विरुद्ध पुर्वदोषी वैयक्तिक भूमिका घेत , जाणीव पुर्वक अशा चुकीच्या प्रचाराचा प्रसार करणाऱ्यांना मी सांगू इच्छिते की , तुम्हांला खरंच वाटते का ? की , मुली लग्नानंतर त्यांच्या मूळ कुटुंबाचा भाग राहात नाहीत ? तुमच्या स्वतःच्या मुलींना तुम्ही हा विचार लागू कराल का ? नाही ना, मग सार्वजनिक जीवनात नेतृत्व करण्याचा निर्णय घेतल्यामुळे माझ्या बाबतीच असा दृष्टिकोन का लादला जातो ? ही बाब फक्त माझ्यापुरती नाही, तर आपल्या समाजातील प्रत्येक कुटुंबातील प्रत्येक मुलीच्या स्थानासाठी आहे. जर आपण असे पुर्वग्रह टिकू दिले, तर आपण समर्पित आणि पात्र महिलांना सार्वजनिक सेवा व सामाजिक जीवनात नेतृत्व करण्यापासून परावृत्त करू .
बँकेसाठी आणि सभासदांच्या हितासाठी माझी बांधिलकी ही आहे की , जी एस महानगर सहकारी बँकेची संचालक म्हणून माझ्या दोन वर्षांच्या कार्यकाळात मी बँकेच्या विकासासाठी आणि सभासद , ठेवीदार , कर्जदार व कर्मचाऱ्यांच्या हितासाठी काम केले आहे. विचारशील , समावेशक आणि समर्पित सेवा हे नेहमीच माझे उद्दिष्ट राहिले आहे. मग का माझ्यावर असे शाब्दिक हल्ले केले जात आहेत?
बँकेच्या सर्वांगीन प्रगतीसाठी मी एक नम्र आवाहन करते की , या फूट पाडणाऱ्या नकारात्मक प्रचाराला नाकारून सत्य समजावून घ्यावे . नेतृत्व, सेवा आणि बँकेच्या सदस्यांच्या हितासाठी समर्पण , समानता, सन्मान, आणि प्रगती यांचे मूल्य जपण्यासाठी आपण एकत्र उभे राहूया. एका न्याय्य आणि आधुनिक समाजात, कोणत्याही मुलीला तिचे कुटुंब किंवा समाजात तिचे स्थान सिद्ध करण्याची आवश्यकता नसावी. स्मिता गुलाबराव शेळके म्हणून माझ्या ओळखीवर मी ठाम आहे, असे ही स्मिता गुलाबराव शेळके म्हणाल्या.

राज्याचे ज्येष्ठ नेते शरदराव पवार यांची कन्या खा . सुप्रिया सुळे , दिवंगत ज्येष्ठ नेते गोपीनाथ मुंडे यांची कन्या ना . पंकजा मुंडे या वडीलांचा व कुटुंबाचा वारसा पुढे चालवू शकतात , मग मी का वारसा चालवू शकत नाही , असे ही स्मिता गुलाबराव शेळके यांनी सांगितले . ]